In u quatru di a tematica scelta da u sirviziu LCC di a Cità d’Aiacciu, emu urganizatu un iscontru trà i sculari di parechji scoli aiaccini è l’idrobiulugistu Antoine Orsini.
150 sculari di setti classi aiaccini di u primariu ani participatu à a tematica pruposta da u sirviziu LCC à i cunsiglieri pidagogichi di l’Iducazioni Naziunali : « A Corsica, una muntagna d’acqua » !
Pesci, fiumi, ambienti, u ciculu di l’acqua, a pulluzioni, u ganciu turchinu… Sò parechji i sughjetti prisintati da u mesi di ghjinnaghju sin’à maghju da Jean pierre Massoni (animatori di u sirviziu LCC) à i sculari di manera à priparà bè stu scontru incù Antoine Orsini.
Dopu à avè ripigliatu è parlatu anch’ellu di tutti sti sughjetti, l’idrobiulugistu hà cuntrastatu è rispostu più d’una ora à dicini è dicini di quistioni posti da i zitelli intarissati assai !
Ringraziemu à tutti quelli ch’ani participatu à stu prughjettu da fà capiscia à i sculari u valori di l’acqua… in lingua corsa !
