Cum’è tutti l’anni, i voci di i zitelli è i ghjuvanotti di a scola di cantu ani risunatu à l’Empire.
A sirata hà cuminciatu cù una ristituzioni di l’attellu di lingua corsa, di ghitarra è di u cantu in paghjella.
Dopu, u cuncertu cuminciò cù a canzona « zitellone », in umaghju à Jean toussaint Santoni, cantata da i sculari ch’amparani à cantà annant’à u tempu periscularu.
Dopu à sta canzona tracarca d’imuzioni, funi prima i minò eppo dopu i più maiò à cantà anch’elli tanti canzoni una più bella cà l’altra.
Belli canzoni ind’un bellu tiatru, i sciaccamani erani forti è numarosi pà ringrazià a squatra d’animazioni pà tuttu u travagliu fattu in onori di u cantu corsu è di u ricordu di Natale Luciani.
